Fjölnir | FRÉTTIR

16.03 2017

Stefán Már í Neskaupstað látinn

Stefán Már Guðmundsson, framhaldsskólakennari og formaður Íþróttafélagsins Þróttar í Neskaupstað lést í gær. Hann var 55 ára. 
 
Stefán Már fæddist í Reykjavík 18. júlí árið 1961. Hann lærði smíði og starfaði í greininni áður en hann flutti norður á Þórshöfn og vann þar sem íþróttakennari.
 
Á fréttavefnum Austurfrétt um andlát Stefáns segir:

Stefán flutti aftur suður áður en hann fór í íþróttakennaraháskólann á Laugarvatni. Að loknu námi starfaði hann sem kennari í Rimaskóla og æskulýðsfulltrúi á Akranesi áður en hann flutti aftur norður á Langanes og gerðist skólastjóri Svalbarðsskóla í Þistilfirði. 
Þaðan flutti Stefán Már austur á Reyðarfjörð og réði sig sem aðstoðarskólastjóra áður en hann flutti sig yfir á Norðfjörð og kenndi íþróttir og smíðar við Verkmenntaskólann.

Stefán Már var athafnasamur í íþrótta- og æskulýðsmálum. Hann ólst upp í íþróttafélaginu Víkingi og var virkur í skátastarfi. Hann var framkvæmdastjóri Ungmennasambands Norður-Þingeyinga, meðal stofnenda Ungmennafélagsins Fjölnis í Grafarvogi, í stjórn Knattspyrnufélags Fjarðabyggðar og formaður Þróttar undanfarin ár.

Hann starfaði einnig í stjórnmálum, var í þingframboði fyrir Bjarta framtíð fyrir síðustu tvennar kosningar og í Fjarðabyggð var starfaði Stefán Már með Fjarðalistanum og var um tíma bæjarfulltrúi. Hann var varamaður í íþrótta- og tómstundanefnd á þessu kjörtímabili.

Eftirlifandi eiginkona Stefáns Más er Vilborg Stefánsdóttir.

Ungmennafélagið Fjölnir sendir hugheilar samúðarkveðjur til ættingja og vina.

Til baka

Fréttablöð

Skoðið blöð gefin út af félaginu

Útgáfa

Fjölnisvörur

Skoðið úrvalið af Fjölnisvörum

Vörurnar

Hvar erum við ?

Skoðið staðsetningar okkar

Íþróttasvæði

Ungmennafélagið Fjölnir - Fossaleyni 1 - 112 Reykjavík - Sími: 578 2700 - aefingagjold@fjolnir.is - skrifstofa@fjolnir.is

Aðalstyrktaraðilar Fjölnis eru: Bónus og N1.  Landsbanki Íslands er styrktaraðili og viðskiptabanki Fjölnis.