Fjolnir

Íslandsmótið í skólaskák fór fram á Patreksfirði helgina 2. – 5. maí. Á mótinu tefldu flestir bestu grunnskólanemendur landsins í tveimur flokkum, sigurvegarar úr kjördæmamótum allra landsfjórðunga. Fjölniskrakkar bættu enn einni rós í hnappagatið þar sem hinn sigursæli Fjölnismaður Oliver Aron Jóhannesson nemandi í 9. bekk Rimaskóla vann eldri flokk mótsins glæsilega. Oliver Aron hlaut 10,5 vinninga af 11 mögulegum. Í fyrra sigraði Fjölnismaðurinn Dagur Ragnarsson mótið eftir úrslitaeinvígi við Oliver Aron. Þeir eru báðir í hinni öflugu skáksveit Rimaskóla sem í haust teflir á Norðurlandamóti grunnskóla og freistar þess að verja titilinn. Oliver Aron hlaut m.a. ókeypis flugferð erlendis á skákmót í vinning. Vinningurinn kemur sér vel því að Oliver stefnir að þátttöku í nokkrum erlendum skákmótum á árinu til að bæta árangur sinn og fjölga ELO stigum. Fjölnir óskar Íslandsmeistaranum öfluga til hamingju með þennan frábæra árangur.

Vegna landsmótsins í skólaskák um næstu helgi þá hefur skákdeild Fjölnis ákveðið að fresta hinu árlega Sumarskákmóti deildarinnar til miðvikudagsins 8. maí. Mótið hefst kl. 17:00 og í skákhléi verður boðið upp á pítsur frá Italiano pizzeria og gos fyrir aðeins 300 kr.

Í sumar munu fimm deildir vera með sumarnámskeið, námskeiðin eru mjög ólík svo allir ættu að geta fundið eitthvað við sitt hæfi. Allar skráning fara fram í gegnum iðkendaskráningakerfi félagsins.

Á Norðurlandamóti stúlkna sem haldið var í Málmey í Svíþjóð um helgina vann Nansý Davísdóttir 11 ára skákkona úr Fjölni glæsilegan sigur í C flokki mótsins og hlaut Norðurlandameistaratitilinn. Nansý hefur tvívegis orðið Norðurlandameistari með skáksveitum Rimaskóla, 2011 og 2012 og hún er í A sveit Rimaskóla sem teflir á Norðurlandameistaramóti grunnskóla í Svíþjóð í september.

Á föstudaginn var 19. apríl var síðasti keyrsludagur frístundavagnsins á þessari vorönn. Allir sem skráðu iðkendur í vagninn fengu upplýsingar um síðasta aksturs dag með tölvupósti 19. mars síðastliðinn. Kveðja starfsfólk skrifstofu Fjölnis.

Það voru um 60 krakkar á grunnskólaaldri sem skráðu sig til leiks á Skákmót Árnamessu sem haldið var í 4. sinn í grunnskólanum í Stykkishólmi. Tefldar voru sjö umferðir með sjö mínútna umhugsunartíma. Það kom ekki á óvart að langstigahæsti þátttakandinn, Oliver Aron Jóhannesson frá Fjölni, ynni mótið en sigurinn reyndist honum auðveldur. Í öðru sæti varð Dawid Kolka frá Helli og tapaði hann aðeins fyrir Oliver Aroni í næstsíðustu umferð. Jafnir í 3.-4. sæti komu Fjölnisstrákarnir frá Rimaskóla Kristófer Jóel, bróðir Olivers og Jóhann Arnar Finnsson með 5,5 vinninga. Allir þessir fjórir efstu tefldu í efri flokki mótsins. Sigurvegari yngri flokks varð Haukastrákurinn úr Hraunvallaskóla Brynjar Bjarkason með 5 vinninga. Hann reyndist hærri á stigum en þeir Guðmundur Agnar Bragason TR, Felix Steinþórsson Helli, Kristófer Halldór Kjartansson Fjölni og Helgi Svanberg Jónsson Haukum sem allir fengu líka 5 vinninga.

Fjölnir 25 ára

Laugardaginn 20. apríl verður Skákmót Árnamessu haldið í 4. sinn í grunnskólanum Stykkishólmi og hefst mótið kl. 13:00. Allir efnilegustu og áhugasömustu skákkrakkar landsins munu fjölmenna á mótið auk þess sem grunnskólakrakkar á Snæfellsnesi eru sérstaklega hvattir til þátttöku á þessu glæsilega skákmóti. Boðið verður upp á rútuferð frá Reykjavík kl. 9:30 á laugardagsmorgni og til baka suður að móti loknu. Öllum þátttakendum verður boðið upp á pylsuveislu fyrir mót og einnig ókeypis veitingar í skákhléi. Í skákhléi verður einnig spurningakeppni skákfélaga sem er nýung á Skákmóti Árnamessu. Gáfaðasta skákfélagið vinnur veglegan verðlaunagrip. Tefldar verða sex umferðir á skákmótinu og í lok mótsins hefst mikil verðlaunahátíð því að rúmlega 30 verðlaun og happadrættisvinningar verða í boði fyrir sigurvegara og heppna þátttakendur. Keppt er í þremur flokkum, eldri og yngri flokk og flokki Snæfellinga. Sigurvegari hvers flokks fær eignarbikar að launum.

Aðalfundur og afmælisdagskrá miðvikudaginn 10. apríl 2013 haldinn í hátíðarsal félagsins í Íþróttamiðstöðinni Dalhúsum